سيارات

كلام لازم يتقال للرجال

كتب _ عبدالرحمن شاهين 

 موقف حصل من فترة   .. كان فيه بنت راكبة عربية هاتشباك محندقة كده و ماشية على سرعة حوالي 70 على اليمين.. (عداها العيب).. انا كنت ماشي 90 و معدى من جنبها (على الشمال و الطريق حارتين بس )
و جه أفندي كده “شبح” قارص بعربيته جامد و خد غرزة من ورايا لليمين (و الفجوة أقل من طول عربيته) من قدام البنت و طار لعالم من عوالم “الشبحنة“..
طيب إيه اللي حصل.. البنت طبعا هدت سرعتها فجأة و ببص في المراية لقيت عربيتها عماله تيجي شمال و يمين و بتعوم بطريقة كبيرة لدرجة ان اللي جاي وراها يمين و شمال هدوا.. البنت طبعا إتخضت و كان ممكن تتقلب أو تلبس في حاجة أو حد تاني..

اللي عايز أقوله إيه.. البنات فيه منهم اللي سواقتهم على قدهم و فيه اللي بتتعلم و فيه البنات المتمكنة.. و ف كل الأحوال لما تمشي بعربيتك.. كأنك ماشي على رجلك بالظبط، و ما ينفعش من باب الرجولة و النخوة إني و أنا معدى على سبيل المثال.. أروح خابط واحدة كتف أو أدوس على رجلها من باب فرد العضلات و المنظرة.. أو التخويف علشان فيه بنت اتجرأت تمشي في الشارع قدامي.. أو أعاقبها علشان ماشية على سرعة قليلة.. مش دي أخلاقنا يا رجالة..

لو انت ماشي على رجلك و فيه بنت معدية هتوسع لها تعدي أو ممكن تقف خالص لو هي هتعدي من قدامك و هتدخل شمال مثلا.. إعتبرها والدتك أو أختك..
نفس الفكرة على الطريق و احنا سايقين.. و يمكن أكتر علشان السرعه مفيهاش هزار و ممكن تكون العواقب وخيمة..

فيه حد هيقولي فيه بنات بتبقى مستفزة و ماسكة الموبايل بصه فيه و مش معبرة الطريق أو بتعدل الماكياج في مراية الشماسة!! – و دي شفتها بنفسي  – هقولك صح.. دي عينات تضايق زي الرجالة اللي بتعمل كده – باستثناء الماكياج – و الأفضل انك تتجنبهم و توسع لهم..

يبقى سواء البنت بتعرف تسوق أو لأ .. ملتزمة بآداب الطريق (و أشهد إنهم كتير فعلا) ولا مستهترة.. لازم توسع لهم سكة و ما تعترضهمش.. علشان دي أخلاقنا قبل أي حاجة تانية..
بلاش تكبس وراها و تقلب العالي أو تفضل دايس ع الكلاكس.. بلاش تعدي جنبها قريب قوي علشان ما تتخضش أو تاخد غرزة ضيقة قدامها (زي الشبح اللي كان بيعاقب البنت علشان ماشية براحة) .. أو إنك تهدي فجأة قدامها و تعمل كيك داون و تهرب … بلاش كده و ده لأن كما تدين تدان و ممكن حساب ربنا يكون وقتي (زي صاحبنا اللي خد الغرزة المستحيلة دي.. لو البنت حافظت على سرعتها و ما هديتش كانت مؤخرة عربيته اتلطشت في بوز عربيتها و النتيجة: هي “هتخيش” في أي حاجة و هو هيتقلب.. فمالوش لازمة  ونرجع ونقول زمان علمونا إن السواقة ( فن وذوق وهندسة )

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق
إغلاق