أخبارنا

” الكِشك ” في الصعيد مركة مسجلة

أسيوط سيد عبد الحفيظ خضر

“الكشك” موضوع كبير.. وعمله بيستغرق أيام طويلة..وبيشترك فيها البيت كله..

علشان يطلعلك بالشكل ده.. خطوات من العمل الشاق بتبدأ مع دخول القمح البيوت..

فتبدأ مرحلة الغربلة من الطين والحصى والقش.. بعد الغربلة القمح ب “يتسرب” ودي

مرحلة تنضيف تانية للقمح بعد الغربلة.. بعدها يتسلق القمح.. وده بيبقى يوم صعب جدا..

خصوصا إن الكشك لازم يتعمل في الحر.. تحديدا شهري يوليو وأغسطس..

بعد السلق يتفرش القمح في الشمس ولما ينشف يتغربل تاني..مشبقول الموضوع

صعب.. علشان يتعبى في الأشولة ويروح الطاحونة يتعمل “دشيشة” ودي مرحلة

مهمة.. لأن الدشيشة لو طلعت ناعمة قوي ممكن الكشك يبوظ.. ولو خشنة أكتر من

اللازم برضو هايبوظ.. فلازم توصي الطحان ياخد باله.. ولما تدخل الدشيشة البيت لازم

تتهوى علشان نشيل قشور حبوب القمح اللي لسه موجودة..

ثم تأتي أهم مرحلة.. وهي مرحلة “الحمو” لما يتحط على القمح “الحامض” ونسيبه كام

ساعة حسب الجو.. ممكن من 6 ل 8 ساعات.. ونسيبه يتهوى تاني.. ثم تأتي المرحلة

الأخيرة العجن والتقطيع لكور صغيرة ونشرها على السطوح وتركها لغاية ما تنشف

تماما.. لكنك في تالت يوم من نشرها ممكن تدوق واحدة علشان تعرف نتيجة عملك

النهائية بنحط على الكشك كمون وملح وفي ثقافات تانية في الصعيد الجواني بيحطوا

عليه شطة.. ونادرا لما تلقى ناس بتعمل كشك عليه سكر.. أيوه سكر ماتستغربش

 

ونأكل الكشك صباحا مع الشاي أو اللبن.. أو على الغدا مع السمن “مطقوش”عليه

بيضتين.. وبرضه يعتبر من التسالي بعد المغربية وفي ليالي السمر الصيفية.. خصوصا

لو معاه طبق بلح محمص وكوباية شاي بالنعناع.

زمان كان عمل الكشك في البيوت بيبقى كرنفال في حب الكشك.. وتسهر العيلة كلها

فوق السطح بالليل ويبدأوا في “كعرمة الكشك” وسط الأغاني والنكات والضحك والهزار

مع نسيم ليالي الصيف لكن دلوقتي الوضع اتغير وبقى الكشك بيتعمل في السر بلا أي

مهرجانات.. ده لو حد عمل أصلا

 

 

” الكِشك ” في الصعيد مركة مسجلة

" الكِشك " في الصعيد مركة مسجلة

https://www.youtube.com/channel/UCv_269CRv2dq7qff2p1RH0w

مقالات ذات صلة

اترك رد

زر الذهاب إلى الأعلى
إغلاق
إغلاق
%d مدونون معجبون بهذه: